Pro 23 | IboBIU | STEP | Mgbe gị na onye na-achị achị nọdụrụ irikọ nri, lezie ihe dị nʼihu gị anya,

Proverbs 23

Okwu nke asaa

1 Mgbe gị na onye na-achị achị nọdụrụ irikọ nri,
lezie ihe ^{▼▼Maọbụ, onye nọ nʼihu gị} dị nʼihu gị anya,
2 tụkwasị mma nʼakpịrị gị,
ma ọ bụrụ na ị bụ onye iri oke nri na-atọ ụtọ.
3 Achọsila nri ụtọ ya ike,
nʼihi na nri ahụ bụ nri aghụghọ.

Okwu nke asatọ

4 Adọgbula onwe gị nʼọrụ maka ịbụ ọgaranya,
atụkwasịla obi na nghọta gị. ^{▼▼Maọbụ, ịdị nkọ gị}
5 Nʼihi na akụ nwere ike ifu
nʼotu ntabi anya dịka a ga-asị
na ha nwere nku dịka nnụnụ ugo.

Okwu nke itoolu

6 Erila nri onye aka ntagide na-enye gị.
Nri ụtọ ya agụkwala gị agụ.
7 Nʼihi na ọ bụ ụdị mmadụ ahụ
na-eche ọnụahịa ihe ọ na-emefuru gị.
Ọ na-asị gị, “Rie ihe, ṅụọkwa ihe ọṅụṅụ,”
ma obi ya adịghị nʼebe ị nọ.
8 Ị ga-agbọkwa nke ntakịrị ahụ i riri
mgbe ahụ, okwu ọma ahụ niile i kwuru banyere ya ga-abụ ihe efu.

Okwu nke iri

9 Atụfula ume gị ịgwa onye nzuzu okwu,
nʼihi na ọ ga-eleda okwu i sitere nʼezi uche kwuo anya.

Okwu nke iri na otu

10 Anarala nwa na-enweghị nne na nna ala ya
site nʼihigharị oke ala e gwunyere site nʼoge gara aga,
11 nʼihi na onye mgbapụta ha dị ike;
ya onwe ya ga-ekwuchitere ha ọnụ ha.

Okwu nke iri na abụọ

12 Tinye uche gị nʼịdọ aka na ntị;
gekwaa ntị nụrụ okwu ihe ọmụma niile.

Okwu nke iri na atọ

13 Ahapụla ịdọ ụmụ gị aka na ntị.
Ha agaghị anwụ nʼihi na ị tiri ha ihe.
14 Jiri mkpara tie ya ihe
ma zọpụta ndụ ya site nʼọnwụ.

Okwu nke iri na anọ

15 Nwa m, aga m aṅụrị ọṅụ nke ukwuu
ma ọ bụrụ na ị ghọọ onye maara ihe.
16 Mkpụrụobi m ga-aṅụrị ọṅụ
mgbe egbugbere ọnụ gị abụọ kwuru ihe ziri ezi.

Okwu nke iri na ise

17 Ekwela ka obi gị kwosa ndị mmehie ekworo,
kama nọgide nʼịnụ ọkụ nʼobi nʼịtụ egwu Onyenwe anyị mgbe niile,
18 nʼihi na i nwere ọtụtụ ihe ọma nʼihu gị.
Olileanya dị ukwuu dịrị gị.

Okwu nke iri na isii

19 Nwa m, nwee uche,
gbasookwa ụzọ Chineke.
20 Anọla nʼetiti ndị na-aṅụbiga mmanya oke,
na ndị iri oke oriri na-atọ ụtọ,
21 nʼihi na ihe niile ga-akọ ha.
Ọ bụkwa nkịrịnka akwa ka onye oke ụra na-eyi nʼahụ.

Okwu nke iri na asaa

22 Ṅaa ntị nʼịdọ aka na ntị nna gị,
akpọkwala ịdọ aka na ntị nne gị bụ agadi nwanyị asị.
23 Zụta eziokwu, erekwala ya,
zụtakwa amamihe, ntụziaka, na nghọta.
24 Nna onye ezi omume ga-aṅụrị ọṅụ.
Ọ bụkwa ihe oke ọṅụ inweta nwa maara ihe.
25 Ka nne na nna gị nwee obi ụtọ.
Ka onye mụrụ gị ṅụrịa.

Okwu nke iri na asatọ

26 Nwa m, nye m obi gị
ka ụzọ m niile nyekwa anya gị ọṅụ.
27 Nʼihi na onye akwụna bụ olulu miri emi,
nwanyị nwe di na-akwa iko bụ olulu mmiri dị warawara.
28 Dịka onye ohi ka ọ na-echere
na-emekwa ka ndị na-ekwesighị ntụkwasị obi baa ụba nʼetiti ụmụ nwoke.

Okwu nke iri na itoolu

29 Onye ka obi ya jupụtara nʼahụhụ? Onye nọ na iru ụjụ?
Olee onye nwere esemokwu? Onye nwere ọtụtụ ihe mkpesa?
Onye nwere mmerụ ahụ nke na-abaghị uru? Onye nwere anya nke na-acha ọbara ọbara?
30 Ọ bụ ndị na-anọ ogologo oge na-aṅụ mmanya,
onye na-aga ịchọpụta mmanya agwara agwa.
31 Elekwasịla mmanya anya mgbe ọ na-acha ọbara ọbara,
mgbe ọ na-ezipụta ọdịdị ya nʼiko
mgbe ọ na-asụgharị nke ọma nʼime iko.
32 Nʼikpeazụ, ọ na-ata dịka agwọ
na-atụkwa dịka ajụala.
33 Anya gị abụọ ga-ahụ ihe ị na-amaghị isi ya na ọdụ ya,
obi gị ga-atụlekwa ihe ndị na-agbagwoju anya.
34 Ị ga-adị ka onye na-edina nʼetiti oke osimiri,
nke na-edinakwa nʼelu ụdọ nʼejide ụgbọ.
35 Ị ga-asị, “Ha tiri m ihe, ma emerụghị m ahụ.
Ha pịara m ihe, ma amaghị m.
Olee mgbe m ga-eteta,
ka m pụọ ga chọọ mmanya ọzọ?”